صدى صوت

جاني وانا في وسط ربعي وناسي

جاني نشلني مثل ما ينشل النّـــاس

منّي نشل روح تشيل المآســـــــي

تشكي من أيام الشقى تشكي اليـاس

اثر الألم في سكرة المـــوت قاسي

ما هالني مثله وانا انسان حـــساس

جابوا كفن ابيض مقاسه مقاســــي

ولفوا به الجسم المحنّط مع الـراس

وشالوني أربع بالنعش ومتواســي

عليه ومغطى على جسمي البـــاس

وصلّوا عليّ وكلــــــهم في مــآسي

ربعي ومعهم ناس من كل الأجناس 

يا كيف سوا عقبنا تاج راســــــــي

وامي الحبيبة وش سوّى بها الياس

اسمع صدى صوت يهز الرواسي
قولولها لا تلطـــم الخــد يا ناس


قولولها حق وتجرّعت كاســـــــي

لا تحترق كلّ يبي يجرع الكـــــاس

أصبحت في قبري ولا به مواسي

واسمع قريع نعولهم يوم تـــــنداس

من يوم قــــــفوا حل موثق لباسي

وعلى رد الرّوح صوت بالأجراس

هـيكل غريب وقال ليه التّــــــناسي

صوته رهيب وخلفه اثنين حـــراس

وقف وقال إن كنــت يا نـمر نـاسي

هاذي هي أعمالك تقدم بكـــــراس

ومن هول ما شفته وقف شعر راسـي
وانهارت أعصابي ولا أرد الانـفاس